Edmond Haxhia, i dyshuar si porositës i vrasjes së biznesmenit Ardian Nikulaj bashkë me dy shtetasit britanikë Stephen Hunt dhe Thomas Mithan ranë sot në prangat e policisë angleze.
Ata ishin shpallur në kërkom ndërkombëtar, teksa sipas policisë shqiptare, pritet që të ekstradohen në Shqipëri.
Policia e shtetit bën me dije se operacioni është finalizuar falë bashkëpunimit mes autoriteteve të dy vendeve të cilat kanë shkëmbyer informacion në lidhje me vendndodhjen e tre personave të dyshuar si të përfshirë në këtë vrasje.
Aktualisht po vijon puna për kapjen e tre personave të tjerë të përshirë në këtë ngjarje, mes të cilëve edhe portugezi që shkrepi armën duke vrarë me 7 plumba biznesmenin në lokalin në pronësi të tij në Shëngjin.
Njoftimi i policisë:
Falë bashkëpunimit të ngushtë mes Policisë shqiptare dhe asaj britanike, pas shkëmbimit të informacionit, lokalizohen dhe kapen në Londër, 3 prej autorëve të dyshuar të vrasjes së biznesmenit Ardian Nikulaj.
Në vijim të veprimeve të thelluara hetimore dhe kërkimore, për lokalizimin dhe kapjen e personave të shpallur në kërkim për vrasjen e 51-vjeçarit Ardian Nikulaj, falë shkëmbimit të informacionit në kohë, Policia britanike mundi të lokalizojë në Londër, të kapë dhe të vërë në pranga, me qëllim ekstradimin drejt Shqipërisë, 3 prej shtetasve të shpallur në kërkim, konkretisht shtetasit E. H., Th. M. dhe S. H.
Ndërkohë, Policia e Shtetit vijon intensivisht punën, në bashkëpunim të ngushtë me partnerët për lokalizimin dhe kapjen e personave të tjerë të shpallur në kërkim në lidhje me ngjarjen.
