44-vjeçarja, Alma Qevani po ecte së bashku me të motrën e saj në këtë rrugë të fshatit Kusarth, që shihni në pamje kur kunati i saj Tefik Tashi i doli para dhe e qëlloi me sëpatë duke e lënë të vdekur.
Ngjarja u regjistrua rreth orës 13:00, ndërsa 44-vjeçarja fillimisht u dërgua në spitalin e Elbasanit, por si pasojë e plagëve nuk mundi të mbijetojë.
Vetë motra e viktimës dhe gruaja e autorit e pranishme në momentin e ngjarjes, tregon shkakun e kësaj ngjarje.
“Ishte nxeh se pse nuk e hapi telefonin. Po unë nuk kisha telefon. Isha bashkë me motrën dhe mori motrën. Ziheshin për gjëra të kota.”
Por një tjetër variant ka dhënë autori i ngjarjes Tefik Tashi gjatë marrjes në pyetje nga hetuesit. Ai mësohet të ketë thënë se e vrau kunatën se nuk i bëri drekën dhe së bashku me vjehrrën e tij e kishin ofenduar.
Ndërsa fqinjët e tyre rrëfejnë momentet e para pas krimit.
“Unë dëgjova zhurmë, gruaja kërkonte ndihmë duke thënë se “donte ujë”. Ajo kishte gjak nga surrati. Ajo tjetra shtrirë, nuk e di unë.”
Menjëherë pas ngjarjes, autori, 58-vjeçar u largua në drejtim të fshatit Bradashesh, aty dhe ku arrestua nga policia.
Sipas uniformave blu në momenin e arrestimit, Tefik Tashi u gjet me sëpatën që kreu krimin, dhe duart i kishte me gjak.
Burime pranë grupit hetimor bëjnë me dije se në momentin e krimit autori ka qenë në gjendje të dehur.
Autori me bashkëshorten e tij dhe viktimën jetonin në një shtëpi.