Nëna e katër fëmijëve të shpëtuar pas 40 ditësh në xhunglën e Amazonës ishte gjallë për katër ditë, pasi avioni i tyre u rrëzua. Mediat e huaja shkruajnë se vajza e madhe ka deklaruar se Magdalena Mucutuy, nëna e tyre u kishte thënë që të largoheshin dhe të gjenin ndihmë ndërsa ajo ishte shtrirë duke vdekur.
Lajmin për mediat e ka konfirmuar babai i fëmijëve i cili theksoi se ka qenë vajza e madhe ajo që i kishte thënë që nëna e tyre i kërkoi të “dalin” dhe të shpëtonin veten.
Vëllezërit e motrat, të moshës 13, nëntë, pesë dhe një vjeç, u shpëtuan dhe u nxorën me avion nga xhungla të premten. Ata u transferuan në një spital ushtarak në kryeqytetin e vendit Bogota.
“E vetmja gjë që vazja e madhe 13 vjeç, ka sqaruar për mua është se, në fakt, nëna e saj ishte gjallë për katër ditë,” u tha babai i fëmijëve Ranoque gazetarëve jashtë spitalit.
Ndër të tjera nëna i kishte porositur fëmijët që të ndiqnin shembullin e babait, pasi ai do të tregonte të njëjtën dashuri të madhe që kishte treguar dhe ajo.
Punonjësi i shpëtimit Nicolas Ordonez Gomes kujtoi momentin kur zbuluan fëmijët.
“Vajza e madhe, Lesly, me të voglin në krahë, vrapoi drejt meje dhe kërkonin ushqim”, ka thënë një nga shpëtimtarët.
Një nga djemtë që qëndronte shtrirë kishte thënë se nëna e tyre kishte vdekur.
Në pamjet e publikuara nga momenti i gjetjes së tyre, katër fëmijët dukeshin të dobësuar nga javët që kaluan duke u kujdesur për veten e tyre në shkretëtirë.
Zonja Mucutuy dhe fëmijët e saj kishin udhëtuar me avionin Cessna 206 për në Araracuara, në provincën Amazonas, në San José del Guaviare, më 1 maj, kur ajo lëshoi një alarm për shkak të dështimit të motorit. Trupat e nënës dhe të dy pilotëve u gjetën në vendin e rrëzimit nga ushtria, por u duk se fëmijët kishin humbur në pyllin e shiut për të gjetur ndihmë.
Fëmijët e humbur u bënë fokusi i një operacioni të madh shpëtimi që përfshinte dhjetëra ushtarë dhe banorë vendas.
Ekipet e shpëtimit i gjurmuan fëmijët pasi zbuluan shenja në xhungël, duke përfshirë gjurmët e këmbëve dhe frutat që ishin kafshuar./abcnews.al
