Një shtetas spanjoll ka humbur jetën mbrëmjen e kaluar në Divjakë. 47 vjeçari Francisco Cervilla është gjetur pa shenja jete në dhomën e hotelit ku po rrinte bashkë me shokun e tij Oskar Valesco.
Ka qenë ky i fundit që ka gjetur 47-vjeçarin të vdekur në dush pasi kishte prerë damarët me thikë.
Valesco ka njoftuar menjëherë policinë dhe është shoqëruar për të dhënë dëshminë e tij. Ai ka treguar para hetuesve se shoku i tij kishte probleme familjare pasi ishte divorcuar dhe kjo mund ta ketë shtyrë të vetëvritet në Divjakë.
Pavarërisht faktit se ngjarja është raportuar si vetëvrasje, uniformat blu po hetojnë edhe për lidhjen mes dy shokëve dhe nëse ata kanë patur ndonjë konflikt me njëri-tjetrin pasi në qafën e viktimës ka patur shenja.
Të dy këta shtetas ishin të punësuar nga një kompani spanjolle e cila thuhet se ka marrë me qira një sipërfaqe prej 40 ha në zonën e Karavastasë, ku po ndërtohen sera moderne për prodhimin e luleshtrydheve, specave dhe domateve.
Ata kishin rreth 1 muaj që rrinin në Divjakë dhe mbrëmjen e kaluar pasi kishin mbyllur punën dhe kishin pirë nga një kafe kishin shkuar në dhomat e tyre.
